الشعر قدامكم حلوا رجاء ٍ اختباره

من طرف **فهد بن محمد** الإثنين مارس 23, 2020 11:03 pm

ان خطرت او ماخطرت ببالكم هذا سؤالي
.............. كم على هالغصن غرد طير ثم كمل مساره

ما عمر طير ٍ مسك هالغصن قال انه حلالي
............. ولا عمر هالغصن حدد طيره بحسب اختياره

فكرة ٍ مرت سريعه او عميقه وسط بالي
............ قمت اداعب غصن شعري واتأمل في خضاره

ما تضيق ابدا علينا والصدر باقي شمالي
................... ياحلاة الشعر دامه حر ٍ ويملك قراره

ما قوت فيه الملوك وسطوة اصحاب المعالي
................. ولا حكم شيخ الشيوخ ولا تأمر به آماره

اه يامعذب فضائك وانت تنساب ارتجالي
............. ساقك الله كالمطر لامن همى فضل وغزاره

اشهد انك ياشعر مهما يقولوا راس مالي
................... ما جتك مني حميا خذتها والله جداره

من هو اللي لانكسر ثم قال خلوني لحالي
............ ما فزع له هجسك اللي لملمه من انكساره

من هو اللي لاطغى شوقه عليه لفقد غالي
.............. ينقش ابياتك على صفحة كتابه او جداره

من هو اللي للغريب اللي توجد ياعيالي
.................. ما تترجم له حنينه لا توجد في دياره

انت هذا لو بعضهم ماعرف يعطيك تالي
................ غير وصف ٍ مثل ماينقال يفقع للمراره

اتنفس من خلالك او تنفس من خلالي
................. منطق ودي احط لصورته داخل اطاره

كان وصلت للتحدث بالشعر ادري فلا لي
................ غير امازجها مابين الجد فيني والعياره

قالوا اني شاعر ٍ ماهو انا حتى ظلالي
............. لو بغى يكتب قصيده بيض الوجه بسماره

فزعة الهاجس تعادل فالتفاعل انفعالي
............... اكترون الذره اليا من تسلسل بانشطاره

يا الاقي فيك من دون التباهي عن مجالي
............. او شجاع ٍ جاء يقدم دون يخجل اعتذاره

ياكثر ناس ٍ تمنى لو تمشى بك بدالي
................... الشعر قدامكم حلوا رجاء ٍ اختباره

كيف تبني بيت موزون ٍ ولا فيه اختلالي
.............. ما تبي هذي ذكاء ولا تبي حتى شطاره

يا تمررها على فاعل فعولن او تلالي
............. او تحاكي نغمة ٍ تلقط من الفطره اشاره

جيت ابكتب بيت للي سببت كل انشغالي
................ بالشعر والا فلا يسوى ليالي انتظاره

لك مداه اللي تناهى لين مافيها حوالي
.............. ولك مساحات التغني والتمني والصداره

كم تركتي نغمة الاشعار تهدى بانتقالي
.............. بين نغماة ٍ تحاكي صوتك الهادي اثاره

انتي اللي علم الابيات ترقى فوق عالي
......... وانتي اللي شكل احساس الشعر داخل مداره

وانتي اللي حددت له نقطة الشيء الجمالي
.......... لين صار يوازن الاشياء من ما وين ساره

رتب الاشياء من يمك تدرج بالتتالي
............... ينتقل حتى يصل عندك ويدخل انبهاره

كيف لا ! والموسم اكبر من خيال اكبر خيالي
.......... كل غصن ٍ انهزع من ارتواءه , من ثماره

علميهم موسم الازهار ياخذ عطر شالي
.............. ثم تباهى به يبثه في مساحات اقتداره

علميهم ان معنى الشوق في صدر الليالي
....... يحتضن اجمل خفوق ٍ ينبض بنبض الطهاره

علميهم ويش معنى كلمة الحب المثالي
............. انه اكبر من تصورهم بمعنى هالعباره

او اقول امشي وخلي كل شي ولا تبالي
........ نعرف ان الوقت توه ما عرف يضبط نهاره