مساء الشعر يااهل الشعر قبل امارس التغريد

من طرف **فهد بن محمد** الإثنين يونيو 11, 2012 5:02 pm

..

انا لامن بغيت اقنص على المقناص اروح بعيد
............. منيب اقنص مقانيص الذي يقنص ورى بيته

هناك اهد طير ما يطير الا يجيب الصيد
..................... على طيب الهداد معوده من يوم ربيته

ابدخل في اساليب الكلام الصعب بالتحديد
.................. على هجس ٍ وردني من بلاده ما تحريته

ابنزع نزعة اللي مطمعه فالشعر للتجديد
................... لذلك هاجس الفكره على الميعاد سريته

بضاعة شاعر ٍ ما قد دخل فيها ابد تقليد
.............. لو ابني بيت ما اعجبني مثل ما ابنيه هديته

مساء الشعر يااهل الشعر قبل امارس التغريد
....................... بلحن ٍ طالما في خافق الملتاع خبيته

بفن الرسم يوجد فن آخر اسمه التجريد
..................... وفي فن الشعر جبته وبالتغريد سميته

لو اكتب فيه انا وشلون سوا بي غرام الغيد
............... كتبت القلب فوق الرمل وموج البحر ناديته

كذا تستنتج ان الموج يغتاله مع الترديد
................. وهو مشهد ولكن في خيال الشعر حاكيته

ما هوب الشعر الا صورة ٍ ما تقبل التجميد
............... تضع احساس بالصوره مثل ما انت حسيته

ابكتب للذي فالقلب بيت ٍ بس للتأكيد
...................... لو ان الشعر كله لو كتبته له تشاويته

لو اجمع سيف ٍ لخالد على عنتر على ابوزيد
.................. وابارز بالشعر سطوة عيونك كان رديته

وانا ماهمني في هالحياة احصل على تمجيد
................... انا همي اذا فرض الله المفروض اديته

هنا في خاطري شي ٍ يسمى همهمة تنكيد
................. ولو ما همني امره ولا ادري كان هميته

اشوف ان الجماعه عرفوني غير انا ما اريد
............... تحت اسمي الى هالحين شاعر كم تباطيته

ابكتب لي قصيده بعد هذي بحرها عربيد
.................... وابين خافي الاشياء مثل ماني تلقيته

مكان ما عطاك الحق خله والله ان البيد
.............. لك احسن من مكان تشعر باحراج لاجيته

انا لمحت للشيخ بكلام مستحيل اعيد
.................. كلام قيل من قبل ان اعدته كني اعميته

انا ارسم للهدف انكان مقدوري قصر ما ازيد
............ اذا الاثنين ما اهتموا خزمت شعيل و شديته

...