بين انفعالات الشعر يولد صباح المغفره

من طرف **فهد بن محمد** الخميس مارس 26, 2020 11:23 pm

بين انفعالات الشعر يولد صباح المغفره
..................... وتغلب طبايع نفسي الثوره بكبت الانفعال

لو أرخي عنان الحزن انكان صدري دمره
................ وان كان هد الحزن ما بالصدر من شم الجبال

والله فلا يلقى بصدري بعدها طير شجره
.......................... حتى يغرد فوقها والا يدور له ظلال

يامن يقول الله على هالشاعر اللي ما اشعره
................ والله فلا جاء لك سوى ربع ٍ من ارباع الخيال

ليل الشعر ايلا انتهى عودت به كي اسهره
.................... ماينتهي مطلع هلال الا ابتدى مطلع هلال

ما قدر البحر بعطاياه الذي ما ابحره
...................... والا تحرى للمطر مثل الذي عنده حلال

ابحرت في بحر الشعر حتى توسطت اغزره
........................ ناوي ادور داخل اعماقه اجابه للسؤال

يامنتظر تطرح سؤالك للرئيس بكندره
..................... والا تجاوب عن سؤال ٍ انطرح للاحتلال

كانه كذا والا كذا قست المقاس بمسطره
................ وتقاطعت كل الخطوط بنقطة احساس الرجال

جر الحنين الذات في ليلة هدوء ٍ مقمره
.................... تطرح سؤال ٍ طالما اتعب عيون الاختزال

وبين الحقيقه والخيال الهامشي مثل شعره
...................... وانا اتوقى بينهن اخشى حدوث الاختلال

كني ابن لعبون يوم يصيح فيها يا مره
..................... لالا تذبين القناع وهو يرى ضيق المجال

ان ماجعلت ظلالي الماشي معي بالمشوره
.................... يكتب شعر والا فلا لي فالشعر سكبة عقال

ولو قلت له سمعني بيوتك وقال المعذره
...................... ما جت معي والله ليبشر بيننا بالانفصال

يا صاحبي شفت النجوم اللي بسماك مبعثره
......................... ترى مهيب مبعثره ومرتبه حد الكمال

بس هي زوايا نظرتك للشي حسب المقدره
............... كل ما اتسع لك هالفضا تصغر مقاييس الجمال

مثل الشعر لما تحلق في فضاء المحبره
..................... الحبر يكتب ماتبي بس انت نبع الارتجال

كم من طريق فالشعر اتهيبه ما اعبره
...................... ماهو على كيفي لأن ما كل ما يعلم يقال

مرات توقد شمعة الايحاء لجل تمرره
................... ومرات تحجم ماتبي تفتح على نفسك جدال

ما خلد التاريخ ابد شعر ٍ كتب للفشخره
.............. رغم ان ابو الطيب تفشخر بس باسلوب اعتدال

واللي يقول انه حوى كل الشعر في دفتره
...................... هذا مثل من قال انا عديت حبات الرمال

الشعر توه ما بعد استخرجوا منه اكثره
..................... ياكم كنوز فالشعر في بطن بحره ما تزال

ياهيه ياللي شعرها هبت نسيم تنثره
................. وايلا هدت هدى الشعر على قوامه واستطال

من الله خلقها كلما مسكت يديها منظره
..................... ما شافت الا نور متوهج كذا فيه اشتعال

هذا السناء وجه المرايه لاوقع فيها ابهره
.................. يعجز يرده مستحيل انك ترى عكس المحال

كم اتعبت سيل الكلام اللي بحرها اجبره
...................... يضيع في وسط اتساعه كلما حدر وسال

و لما عبارات الشعر جات لبحرها تسبره
........................ تشوفه اكبر من تغامر فيه وتعده خبال

الى هنا ياقف جميع القول تحت السيطره
...................... وايلا هنا يخضع جميع الشعر وابليا قتال