تعلمت الشعر لجلك وقتلني خشية الأملاق

من طرف **فهد بن محمد** الإثنين أبريل 06, 2020 11:01 pm

تعلمت الشعر لجلك وقتلني خشية الأملاق

.......... عجز ياصلك وخاف أني لك أوصل سلّ سكيني

أثر هالشعر لك عاشق ولقاني ثاني العشاق

.................. وخاف أنك على ما فيّ ولا عنده تحبيني

من الرهبة يده أخطت لقلبي حطها ف الساق

............... ولزمت الشعر من حلقه وقع مسكين بيديني

رجاني ثم عفيت بما معي من شيمة الأخلاق

............... بعدها صار مرسول ً يوصل علم و يجيني

مغير أشواق في أشواق في أشواق في أشواق

.................. وشاعر كاتب ً بيتين أيا شوقي وبيتيني

مشاعر لك من الخاطر مثل ما جاتني تنساق

................... وعلى أي أتجاه أسوقها بذكراك تسقيني

أنا ودي أضمك وانت في حضني ولك اشتاق

.................. وأنا أشكي لوعة الفرقا ولو أيديك بيديني

أبيك تلف هالدنيا وتسأل ساير العشاق

...................... إذا فيهم أحد يمسيه ليل ً كان يمسيني

وابي تقرا دفاترهم وفتش ساير الأوراق

................... وقارن في دفاترهم بصفحة من دواويني

وهات جروحهم جملة أسكتهم بجرح فراق

................... وبعدها يحمد الله عاشق ً ما فيه ما فيني

أنا ما انساك لو الشمس تنسى صبحها الأشراق

............ ياكيف أنساك يا رسم ً رسمته رسم في عيني