الى قصيدة طال انتظارها

ضوا ليلي ولا جيتي وانا كلي وله واشواق
تركتيني على هجس الثواني احبس انفاسي

قبل مده كتبنا موعد الليله على الاوراق
طواها صبرها وانا طواني مثلها ياسي

قصيدة عمري الاجمل تحريتك وصدري ضاق
سجنتي كل احلامي قتلتي فيني احساسي

يمر الموعد وتصغر معه في عيني الافاق
تباطيتك كاني شايل الدنيا على راسي

انا خوفي عليك اكبر من اللي يحرم العشاق
لذيذ النوم في حضرة زمانٍ ظالمٍ قاسي

يمنيهم زمنهم بالتلاقي ثم يزيد فراق
وانا وياك نتحرى وزمنا يالغلا ناسي

حكايتنا حكاية ليل ما مثله على الاطلاق
تكفي نظرة مني على رعشات كراسي

ادور لك على خط الكتابه وارقب الاشراق
ولكن وين دام الليل هو سجني و حراسي

وحيد ٍ كلما فزيت لي من معمعة اطراق
وجدتك ضايعه عني ولا حصلت هوجاسي