قصيدة وتذكار

اللي يعزك يتركك انت تختار
ما قد حصل بالغصب تتجمع قلوب

ترا الغلا سرٍ عميق بالاسرار
ما يصنعه ابدا تصنّع واسلوب

الروح اذا شعت بها بعض الانوار
عنها الظلام المعنوي كله يذوب

يا فاتنة ما قد سألتي هالاسفار
هل هي تحددها مسارات ودروب

لو كل طير ٍ عاند الريح ما طار
كل شي بين الريح والطير محسوب

وبنقسم الليلة على اثنين شعار
من دلتين مبهرة نملي الكوب

ما همنا فيها ابد نهج الابهار
يكفي ندندنها على ذاتنا نوب

رغم ان طموحات الشعر دايم كبار
والسعي للابداع ثابت ومطلوب

معيارنا فيها مهو اي معيار
واحساسها لاحساس الاثنين منسوب

صيغت لجل تبقى قصيدة وتذكار
فنجال من دلة هل الشعر مصبوب

او قل كما الجيران جار عزم جار
وتقاسموا للزاد اكتاف وجنوب

حشيمة للذات والطيب والدار
وبفلسفة ما فيه غالب ومغلوب

هذا هدفها يا طويلين الاعمار
وهذا هدف سامي وفالشعر مرغوب

ما هو مهم اللي يجمع للازهار
بس المهم تنسيق الازهار باسلوب