بغيت اكتب لها شي ٍ مهوب الي كتبت الان

من طرف **فهد بن محمد** الجمعة سبتمبر 06, 2013 2:43 am

اذا كانت مسافات العتب ماتكفي الاشجان

اجل وشلون تقوى هالقصيده في مساحتها

ابكتبها وابي تختار من ذاتك لها عنوان

وابترك شاعرة نفسي بها تاخذ لراحتها

انا ممكن اشكلها برمزية ثلاث الوان

يكون اللون الابيض واحدٍ يعكس صراحتها

تصدق نفسي احيانا تعاندني على الميدان

ولكن لا تخاف العقل يترصد بجاحتها

مثل موج البحر لما يعاند هقوة الربان

كذا امواج نفس الادمي تظهر شفاحتها

وارسي مركبي في شاطيٍ آخر من الشطآن

هنا تنهي سفينة خاطري آخر سباحتها

على شاطي هذيك اللي تجدد فكرة الاوزان

وتعطي للغة اكبر مساحه في فصاحتها

بغيت اكتب لها شي ٍ مهوب الي كتبت الان

ولكن ويش اقطف من عجايب نبت واحتها

تهازع لي غصون ٍ مثمره بالخوخ والرمان

وتفوح ازهارها ياوجد عيني يوم فاحتها

لو اني ما امسك لسان القصيده في بعض احيان

مخافة تظهر اسرار الجمال ان كان باحتها

عرفت الان حيرة هالزمن من بدة الازمان

كانه جمّع خيوط الجمال بوسط راحتها

رح اسأل زهرة تنمو على قمة جبل لبنان

اذا ما سولفت عنها مثل ما كانت اوحتها

رح اسأل مشرق الشمس ان بدا وجه الصباح يبان

اذا ما كان ماخذ هالملاحه من ملاحتها

وانا واستغفر الله بس للتقريب والتبيان

اقول الشمس لو ممكن تزاح ان كان ازاحتها

اضافت للوجود السر الاكبر في حضور انسان

واعطت للوجود النفحه الي من سماحتها

ولو به مملكه للحسن ترفع راية الرومان

بنظرة من محاجر عينها ان كان اطاحتها

ولو رصوا متاريس الغرام بنخوة الشجعان

بضحكه فرقت لجموعها ثم استباحتها

انا ما ابرز جمال عيونها او جسمها الريان

انا اقصد غفوة للزين طالت جات صحتها

من طرف ????? الأربعاء أكتوبر 16, 2013 8:24 am

انا ما ابرز جمال عيونها او جسمها الريان

انا اقصد غفوة للزين طالت جات صحتها

صح لسانك
رائعه جدا

تسلم الروعه قرأتك لها

من طرف اجمل لحن الأربعاء أبريل 02, 2014 8:42 pm

الله .... اكثر من راااائع

من طرف **فهد بن محمد** الجمعة أبريل 11, 2014 12:56 am

شكرا واهلا وسهلا بك
شرفني حضورك الاروع هنا
يا اجمل لحن

رد: بغيت اكتب لها شي ٍ مهوب الي كتبت الان