بغيت اصنع من الاشعار طياره

من طرف **فهد بن محمد** الخميس مارس 26, 2020 11:38 pm

تعادى داخلي خيل المشاعر باول المشوار
............... ويهتاج الشعر في داخلي واعجز عن خيوله
انا ماني وكيل الله على ما تكتب الشعـّار
...................... ولكن كل شعر ٍ فيه من ما فيه مدلوله
تحت تأثير لحظه قد تولع فالورق بالنار
................. وتحت تأثير لحظه تزرع الازهار بسهوله
وممكن في شطر بيت ٍ تضمّن أخطر الاسرار
................... وممكن تكشف بشطر ٍ لسرٍ يسقط لدوله
كذا كان الشعر له هيبته واصبح قصير جدار
.................. وصار اللعبه اللي من بغاها دلدل رجوله
تحت تأثير لحظتها ابزرع فالسهول ازهار
................ وباستخرج معاني في خفوقي والقي حموله
ايلا حددتها بالاسم غار اللي قبل ما غار
..................... واذا اخفيتها غنت لها الاشعار مذهوله
هي اللي علمتني كيف ارد بطيبتي للثار
................ وهي اللي وقفت نزعة مشاعر قول مهبوله
بغيت اصنع من الاشعار طياره بلا طيار
................... وبغيت ادك به اسوار عالم شبه مجهوله
لها مني تباريح المسا وانشودة الامطار
...................... ولها مني حكايات ٍ تخبّي شي وتقوله
هي اللي علمت هجس القصيد يزود المعيار
............... يحاول يلحق اقصر ما تطول ويعجز يطوله
وهي من اثبتت ان الشعر لو انقلب ثرثار
................... وقطع اطول مدى ما كنه الا يبترم حوله
حكاية ابتسامتها علاقة صبح بالانوار
..................... وحكاية شعرها ليل ٍ ولكن ليل ياطوله
وحكاية عينها بحر ٍ كذا يستدرج البحار
................ ويجد بحر ٍ ورى بحر ٍ بلا شطآن موصوله
وحكاية نطقها للحرف في خفه بدون انذار
.................. بصوت ٍ كل احاسيسك معاه تكون مشغوله
وحكاية عذرها لاجت تعذر آه يالاعذار
.......................... حكاية طفلة تتحجج باعذار مقبوله
حكايات مهيب الا معاها بس ويش اختار
................. ومش معقول فرتها وصارت عقب معقوله