خبري بعمري يوم غمضت عيني

من طرف **فهد بن محمد** الجمعة مارس 27, 2020 12:13 am

لا قلت لي وينك اقول آه ويني
............ حتى انا من رحت مدري انا وين

خبري بعمري يوم غمضت عيني
............... واتذكرك واسج واخذ لي سنين

ياخذني لنفس الاماكن حنيني
............ والمحك في روضة خيالي تمشين

الموت لامديت ساهي يديني
............... وحولي احد ويقول مديتها لمين

اجاوبه فيني وجع يعتريني
.............. وملزوم امرنها من الحين للحين

هم ما دروا مديتها لك تجيني
.............. لاشفت طيفك قلت حياك يا زين

ولا قلت قلبك قلت عندك رهيني
.......... طمن نظرك لصدرك تحصل اثنين

قلبي ولكن عانقك ما يبيني
............ من رحت مني وانت رايح بقلبين

لحظة رحلتي صاح لحظه خذيني
............ ثم ٍ صنع من شوقه اقوى جناحين

فهق ضلوعي وتلها تل ليني
.............. حسيت دمي فار وسط الشرايين

قالت وشعرك هو بقى يحتريني
.................. قلت الفضا كله مليته دواوين

قالت ابسمع شي قلت اسمعيني
..................... ابختصركل القضيه ببيتين

يالغايبه جيش الوله صدقيني
............... روح بقلبي مثل روحة فلسطين

الجرح اكبر من معزة جبيني
............. وذل الهوى ذل العرب بالموازين

يعني ضياع وطالبك دوريني
.......... قولي رجعت اجيك من ضيعة البين

قالت رجعت وردت الروح فيني
..............قلت العرب قالت ايلا ردوا الدين