معاناة فقيرة

من طرف **فهد بن محمد** الخميس مارس 26, 2020 7:17 pm

يا من ورى دنياه يركض ومشغول
لو طالت ايامك ترى العمر فاني

من لا رحم ما ينرحم ساعة الهول
في موقف يعجز بوصفه لساني

مسكينة ٍ تشكي من الفقر وتقول
يامسلمين انا وبناتــي نعانـــي

الماء شحيح و كهرب البيت مفصول
والبرد ما يرحم عري المحاني

واطفال تتقاتل على حبة الفول
وناس ٍ تباهى في كبار الصواني

لاجاعوا صغاري ولا فيه مأكول
قمت اتحايلهم بدافي حنانــي

وتضيق بي دنياي ماعندي حلول
غير البكاء اللي لا بكيته بكاني

البيت موطن حزن والحلم مقتول
ودمع البنات بعينهن شي ثاني

هذا انا ويا الليالي على طول
اصارع اللحظات وانطح زماني

الناس تحسبها من الحول للحول
وتعداد وقتي احسبه بالثواني

حاولت ما خليت باب ٍ لمسؤول
اطرق على الابواب محد ٍ عطاني

كني اعيش بعالم شبه مجهول
اجاهد الدنيا وكل ٍ نساني

كونك فقير تكون مهمل ومذلول
وبيتك توارى خلف كل المباني

وتصرخ بوسط الحي والحي مأهول
وياكن خلق الله بليا اذاني

ياشينها لاصرت معدم ومعزول
تنسج من الآلام ثوب الاماني

ترقد على الخذلان وتقوم مخذول
وخذلان نوم بينها ما هناني

معقول قل الخير فالناس معقول
وصرنا ضحية مجتمعنا الاناني

انا لي الله وان بخلتوا فلا حول
اخشى عليكم لا تجون بمكاني

انت الامل يالله ياخير مأمول
اخذت من قسم الشقا ما كفاني