بنت الملك زعلت على بنت باشه

من طرف **فهد بن محمد** الخميس مارس 26, 2020 6:58 pm

ياهيه ياللي زعلت كل مزيون
.................. بنت الملك زعلت على بنت باشه

لا فمها فم ولا عيونها عيون
.................... الزين ما له بالنسب والحماشه

قولوا لها ياللي تروحون تكفون
.................... ورد الهوا يبكي غياب الفراشه

استفتحي يامزنة الشعر بالهون
....................... لياي انا وياك نبلش بلاشه

ان جلجلت برعودها وارخت متون
................. وصبت مطرها ماترشه رشاشه

والله ليظهر لي ولك الف مجنون
...............وبعض الشجاعه في مواقف دباشه

تزعل عليه ياقلم ليه وتخون
...................... امر الاصابع تكتتبها نواشه

ايلا ارتعش بيدي قلم لا تظنون
................... للبرد ذنب ٍ في سبب ارتعاشه

لاوالله الا رعشته مثل مطعون
............... جا له خصيم واوقضه من فراشه

ما امداه يلمح خنجر الخصم مسنون
.................... الا وهو قد علقه فالحشاشه

دامي انا ويا القلم تحت قانون
.................. يمكن اسبب معركة في نقاشه

صدق الكتابه ترّث الشاعر ديون
............... يستعدي السلطان ويقطع معاشه

بس كلمتي لو كان ما تصلح الكون
............... وقولوا سبقني لو بغيتوا عكاشه

احفر على صم الصخر لن تنالون
............... وانقش عبارة وش بلاكم نقاشه

ماراح بالقوه مثل ما يقولون
............... ما ترجعه حبة خشم او بشاشه

في منخلي كل العرب نصف مليون
..............صفيت منهم من بصدره غشاشه

قلت اه ياللضيم وعيال صهيون
............... ماعاد خلت في ذممكم عراشه

وعلى بعضكم بالاقاويل ترمون
............... وكل يبيع ويقبض الكاش كاشه

هامان ما مشى سخافات فرعون
............... يدري بسر الفبركه و البكاشه

ولاهوب لا سر ٍ ولاهوب مدفون
...............لكن عيون الناس فيها غباشه

صاح القلم وقف هنا نوزن التون
........... تبدا غزل و اشوف صارت هواشه

ارجع بنا للي لها القلب مرهون
.............. اخذت منحى ٍ فيه بعض الدفاشه

قلت اه والفرقا لها سبعة لحون
.............. غنت بصدري واهلكتني وحاشه

مشتاق لك شوق اذا قلت ملعون
............. يزعل ا بليس ويشعره بانكماشه

وفوق اشتياقي لك انا الان مسجون
.............. لما كتبت من الورق فوق شاشه