ايلا نادى على ليلاه قلت الليل يا منيره

من طرف **فهد بن محمد** الخميس مارس 26, 2020 6:40 pm

بداها شاعر ً راسم خريطتها بتفكيره
................. يعرف دروبها ما هو يسير وينشد الرعيان

عبيط ً هالشعر لكن لمثلي تم تسخيره
.................. ركبت بساط ريحه ذلل بساطه لي الرحمن

إذا كان الوجع في ليل واسود كيف تصويره
............... وإذا كان الشعر دونه بحر وش ماسك الربان

لو ان الشاعر احيانا ً يضعكم في دواويره
................ تعرفتوا على المنظومةً الآخرى من الالوان

رغيف الخبز نسا الجايع التفكير في غيره
............ وسراب الماء يصير الماء بعين التايه الضميان

ما هوب اكبر همومي درب ً استهوي مسافيره
................... ولكن اكبر هموم الدروب ان جيتها ولهان

فهمها الشعر وما يحتاج اوضح ويش تفسيره
................... مثل هالوادي الي هو وسكانه تحت بركان

كأني والشعر صقار طير ً ينتخـي طيره
................... يعود الطير له بالصيد والا ما يعود احيان

إيلا ضاق الصدر تليتها لطويق ما غيره
.................. وإيلا اشتد الوله تليتها قطر ً على الصمان

ما نيب ازبن على قهوه واشاكي راس تعميره
................. ياليت المسأله كرسي وشيشه او بكت دخان

الا ياسيرة الفرقا الا يقطعك من سيره
................. متى ما امتد حبلك يبتسم من فعلك الشيطان

وش انتي غير نبع ً للوله والشوق والحيره
............. وش انتي غير لحن ً ناشز ً في اروع الالحان

وش انتي غير قسوة لحظة ً تطعن لها خيره
.............. وش انتي غير تفريق ً ما بين انسانة ً وانسان

ايلا نادى على ليلاه قلت الليل يا منيره
..................... اخذني في ميادين الوله واستاسع الميدان

وإيلا هاضه جناح الشوق حول له على ديره
..................... ولها فالقلب ديره وسط ديره ما لها بيبان

لو ان لي امر في تغيير شيً قبل تدبيره
.................. مسحت لطاري الفرقا وكنه من قبل ما كان