حلاها كل ما ترقص ...??

من طرف **فهد بن محمد** الثلاثاء مارس 24, 2020 12:04 am

رجعنا يالقصايد بعد ما طالت بنا الاسفار
---------------- ورجعنا للبدايه بعد رحله دوخت راسي

بسيطه ما عليش ولا تقولي ضيعة المشوار
------------ محلك والله بصدري ما هيب اوراق كراسي

لجل طاريك نسري ما ندور بهرجة انوار
------------- وقوفي تحت انوار ً سوا عندي ومجلاسي

الا وشعاد ازين من زهر هالروض يالنوار
------------ ولا وش عاد ازين من وجودك بين انفاسي

تبين اصل الوجود وروعته اني اشب النار
------------- مسا وياك ثم تبدين رقصك فوق قرطاسي

حلاها كل ما ترقص تقول اي رقصة ً تختار
------------ وتسأل أي رقصه داعبت بالحيل احساسي

اقول مدري ولكن كل رقصه تقطعين زرار
-------- وكل رقصه اشوف اني مليت من الضما كاسي

ولكن والله ان السر الاعظم بين هالاسرار
------------- وسط كل هالتثني كيف يقسى قلبك القاسي

تغابين الدقايق ثم تجين بواهي الاعذار
-------------- وتعرفين الدقيقه عام في عرفي ومقياسي

وقالت لا حشا والله ما مليت لك مسيار
-------------- انا هوجاسك ان ناديت الا يالله هوجاسي

انا خلفك وقدامك يمينك او تلدّ يسار
--------- تجدني بس اشوفك صرت هاليومين وسواسي

غرامي قم بنا نلعب ونترك باقي الاخبار
-------------- وكل ً يرفع الشيله تغني وانقض لراسي

وكذا دايم تعاتبنا وتفاهمنا على ما صار
--------------- وهلا بالماستي قالت هلا يا عقد الماسي