حلقة الليله عن كليب ٍ يسمى البردقانه

من طرف **فهد بن محمد** الإثنين مارس 23, 2020 10:36 pm

انبلج ياصبح ليل الشعر من شان الطيور
............... باقيه باغصانها والكل ممرح في مكانه
المصيبه انها مرت على الدنيا دهور
................ وانت مابينت طال الليل لاتبطي امانه
هيه يالشعار والدعوى تراها بالشعور
................ ماتجي في حيز الممنوع والا فالإهانه
من تحزم واحتزم لا تاصمونه بالغرور
................ النوايا هي اساس الشي حتى بالديانه
بس اذكركم بأن الامر تحديد الامور
................ مثل ما سوى نهار المعركه ابو دجانه
والله اني ما احب احطها بين السطور
........... الوضوح اوجب على الي وده يوصل بيانه
فوضويتنا تعدت منطق الفكر الصبور
........... وكلمة الحق اصبحت تالي بمجلسها جبانه
ياكثر ما نفتخر في شي والشي مخبور
................... جاهليه مُنتنه وشلون نقبل بالنتانه
ياكثر ما دارت الدنيا وهي طبعا ً تدور
................. ما تعلمنا من الدورات غير الاستكانه
ياكثر ما ندّعي لكن على ما قيل زور
.................... ان فينا وان فينا تستمر الاسطوانه
فيلسوف العصر قال الله يكفينا الشرور
................ ان بغيت تحدد الاسباب فتش فالبطانه
انبنا مناك سور ٍ وانبنا مناك سور
............ وما وراء السور يصبح دايما تحت الصيانه
نبتلش في زحمة الدنيا نفتش عن فطور
............. ناس تاكلها النحافه وناس تطعمها البدانه
النظام اساسه الاصلي سجلات الحضور
................ ويصبح الانتاج توقيع ٍ ولا له أي خانه
وش بلانا ماقدرنا نصنع صحون وقدور
........ ينطق الشاعر او احسن يسكت الشاعر ذهانه
ياوسع صدر الشوارع للذي فيها يدور
............. الوطن اعطى شوارع ما يقصر في حنانه
القضيه رقم واحد فالتنقب والسفور
............... اسف اقصد رقم واحد منتخبنا وعنفوانه
وبينها يبدا الحوار ويسعد اوقات الحضور
............... حلقة الليله عن كليب ٍ يسمى البردقانه
ايّه الاخوه ترا ماهي مثل ما فالقصور
............... احذروها خص لما ترقص السمرا لعانه
يازمان الهرطقه بين الركب حتى الصدور
............. وقفت كل القضايا وصارت السمرا مدانه
فيلسوف العصر قال الارض ما ترفض بذور
........... بس كل ارض لها نبت ٍ مخصص وبزمانه
لا تخاف ابدا ً ترى المنجا ونوع من الزهور
............. مستحيل بارضنا تنبت اذا ً وين الخيانه
يعني من اخر مداها والله ان دمي يفور
.......... كل هذا الي يصير بودي اعرف من عشانه
والقصايد كانها ما غاصت بعمق البحور
............ وجابت من البحر شي وخلت ليا دان دانه
او تساوى كل طير ٍ في نظر راع الطيور
........... ثم تشوف الحر الاشقر واقف ٍ ديك ٍ وزانه
كل مانسمع شعر يقفاه عداك القصور
............ او ياصح الله لسانك منين صح الله لسانه