تركت افراح عمري في سماك تلون الابعاد

مسافر ياصباحات المدى كل الدروب اجداد
كاني ما تغربت بحياتي عدت من ثاني)

حنيني ردني يمك وانا كنت اعتقد باعتاد
على الغربه ولكن وازع الاشواق ناداني

صحيح نروح لكنا نروح بصيغة الاجساد
اروح وياكثر شي ٍ تركته خلفي ابقاني

تركت افراح عمري في سماك تلون الابعاد
وش اقسى من اسافر عنك واترك علبة الواني

كأني بعدك بموعد ولا احد ٍ جاء على الميعاد
مواعيد ٍ تكرر والنتيجه ما حد ٍ جاني

كأني بعدك بدون امنيات الزرع للحصاد
اعيش انسان لكن داخلي ضيعت انساني

فراغ ما تصورته جمع جيش ٍ من الانكاد
الا ياكيف احث السير وهذا شكل ميداني

حياته كلها بعدك حياة اللي وقف نشاد
وكل ركب ٍ يمره يسأله ياكيف خلاني

يسلي نفسه بريحة أثر من مر له ببلاد
ولو عابر سبيل ٍ مرها ماهوب متواني

انا ما الوم مثلي يوم غناها على الاشهاد
واميز نبرة المشتاق عبر احساس وجداني

اعرف الصوت ايلا غنا طرب والا حنينه زاد
احد غنا وهو معنــّا واحد يادان ياداني

دوا الغربه اذا تسأل فلا له طب غير يعاد
خفوق ٍ تم نزعه من مكانه رجعه ثاني