انتي مركز جاذبية كوكب الحسن وثباته

ودي اكتب لك قصيده فالشعر من محكماته
............... امنيه لي من وانا طفل ٍ ومن كنتي بنيه
لو يحقق من تمنى اكبر الي بامنياته
.................. كان ماهمه ولو ما طال تحقيق البقيه
تكفي الشاعر قصيده بس تسوى في حياته
............ مثل من يختار صاحب ما يفرط في خويه
ياحلاة الشعر فيها لو تطاول ياحلاته
................. خلته يظهر كنوزه من بطون الابجديه
ايه هات الي معك ياهاجسي ذا الليل هاته
............... كان تقدر تستميل الحرف لا تبخل عليه
استدر داخل خيالي في مدى اربع جهاته
.................. لخبطه حتى تقوّم فيه حرب ٍ عالميه
وانتظر حتى يرتب بعدها ذاته بذاته
.................. لين تسمع للبلابل بعد صوت البندقيه
ويش ليل الشعر اذا ما كان لبسها عباته
................. وكان ما لم النجوم وجاء وقدمها هديه
في خيالي وش يقول الروض عن سيرة مهاته
................... لاتمشت في مساحاته بطلعتها البهيه
دامها فيه ابشر بيزهر من الذكرى نباته
............... لين شكل من زهرها فالقصيده مزهريه
ما له الا يرسم اجمل لوحة ٍ من نادراته
............... لوحة ٍ ترُسم ولكن حسب رؤيه فلسفيه
ان مشت به غيرت جوّه على كل التفاته
................ وداعبت نسماته الي من مداعبها عذيه
وكونت له من شذاها ما يعطر امسياته
............... وعلمت ليله حكايات السَمَر والنرجسيه
تعرفين اخر وصايا الشعر في اخر حياته
................. كانت البيتين هذي كلما في هالوصيه
(انتي مركز جاذبية كوكب الحسن وثباته
................ مثل ما للكون مركز من مقر الجاذبيه
انتي الي وزع الزين لزهوره ولبناته
.......... وانتي الي حط في حس الشعر هالشاعريه)