عذرا وبدويه

من طرف **فهد بن محمد** السبت يونيو 16, 2012 10:14 pm

حلق الطرق وبواقيه أستغاثت بالبقيه
................... لا تخليني طريحه بس ما يملك خياره

كل ما حطّت وطارت لازم تخلف ضحيه
............ لين ما ياصل سوى اللي ما وصل الا بجداره

وكان ما جات القصيده من شوايبها نقيه
................ كان والله ماتساوي جزء من هم أنتظاره

والقصيده من ذكاء الشاعر تجي مثله ذكيه
................. وكل معدن للتفاعل له ترى نسبة حراره

الحذيه ياشعر قال الشّعر جتك العطيه
.................... الله الله من يجاور للشعر يفخر بجاره

أبدويً كل ما جاني وايلا يسحب طليه
................... من كرم جاب الذبيحه لوّها جية زياره

مرّ صبحني ومرً زارني عند العشيه
.............. قلت وش عندك وقال أطلب و أدور أستشاره

ماتشوف سهيل باهت ما طلع طلعه بهيه
.................. وما تشوف الليل ساكن ما يريحني قراره

صمم الشاعر قصيده والنحل صمم خليه
.................. النحل من شمع والشاعر يصمم من حجاره

أرتفع ياطير عن ضيمك عسى ما بيك بيّه
................... ما يضيم الطير غير اللي جهل فن الصقاره

من عرف سجع المعاني ما لقى فيها رديه
................ ومن جهل معنى الاثاره كيف يشعر بالأثاره

أن بغيت أختارها جات بلغاتً أجنبيه
.................... أخترع لحروفها حتى تجي حرف وأشاره

أستدارت وأستمالت بالغصون اللي طريه
......................... نغمةً ما حللوها لو يودوها الوزاره

مثل لفتات الحذر في عين عذرا وابدويه
................... يوم صاحت تعتزي وبعيونها قدح الشراره

من سمعها تعتزي لجّت به عروق الحميه
................... لا أعتزت عذرا البدو كلً يرى هالثار ثاره

ألتوى راس القلم كنّه يبي مني هديه
.................... والقلم يدخل معي في مرحلة رقصات زاره

لازم أعزف له على المطلوب نغماتً شجيه
....................... ومن يغني للقلم لحنه فهي راس الشطاره

فيه شعّار يجون الشعر بالينه بليّه
...................... مثل سواقً يسوق بدون رخصه وأستماره

ولو أنا ما احسب حساب ِلردة الفعل القويه
....................... كان والله تسمعون لشعر من شعرالصداره

بس أنا خذت الشعر من باب فاتح للشهيه
...................... ما اقدر أتصور حياتي دون ما شعر وعباره

آسف إن طالت عليكم هالفصول المسرحيه
........................ بس أنا مضطر أوقفها بعد رفع الستاره