لو اني ما ارحم احيان القصايد كان اعذبها

من طرف **فهد بن محمد** الإثنين يونيو 11, 2012 4:52 pm

مصيبة واحد مثلي ماهي وشلون يكتبها
........................... ولكني بحاول واتوقى والله الواقي

انا ما ابي قصيده مثل ما قالوا اكركبها
.............. حرام ان القصايد ذي تجي في وسط اوراقي

انا اتحرى متى ترسي على شطي مراكبها
..................... واحس بشوقها ينزع مع الاقبال خفاقي

هنا ناس ٍ ماعاد أي شعر مني صار عاجبها
..................... تبي شعر يناسبها تبي يعني شعر راقي

وانا مانيب شاعر كان ما البي مطالبها
................... لذلك حانت اللحظه وجتني حالة اطراقي

ابعبر فالخيال بحور ودي بس اجربها
.................. يا فيني تغرق بحور الشعر او تم اغراقي

لو ان ايقونة الشعر انجليزي كان اعربها
................... وانسقها على كيفي حسب ترتيب انساقي

تبون اكثر اقربها انا حاضر بقربها
.................... نهر دجله يبي يبقى رغم تغريبه عراقي

صحيح ان العرب نامت ورفاعة صلايبها
.................... تعادى وسط ميدانه تطربق فيه طرباقي

وانا والله ما ودي كذا بالحيل اخربها
.................. وانادي للفرات ارجوك لا ترجع لنا ساقي

تركت النيل من شرهه وهو يعرف سبايبها
.................. متى وادي حنيفه سال حتى اطلق اشواقي

بعدها يرجع الموضوع للي لي مطالبها
.................... اوامر لو تقول اكتب كتبت بدمع احداقي

سلام الله عليكم عد ما هبت هبايبها
....................... ياربع ٍ علمت اخلاقهم اشياء لاخلاقي

يقولون المجالس من اهلها لك مكاسبها
................... واقول الحمد لله كم معاكم تكسب اسواقي

ويقولون احذر لكلمه تغثك في عواقبها
...................... واقول الشكر لله ملتزم عهدي وميثاقي

لو اني ما ارحم احيان القصايد كان اعذبها
................. تبي تتعب معاكم بس يغلب عندي اشفاقي

لاني لو كتبت اللي ابي فيكم باعاقبها
.................. تبي تتعب تحاول تنقل اللي داخل اعماقي

لكم و لها موده كل وحده في مراتبها
....................... لكم ود الاخوه بس هي ياوين ابالاقي

انا ويا القصايد كم تعاتبني واعاتبها
......................... ولكن فالنهايه ترجع وتشرق بافاقي

واقول الها ياكيفي كنت فالرحله اداعبها
.............. وهي قالت ياكيف تشوف في داخلك اشراقي

اقول اشراقك اشوفه غبش قصدي اعصبها
.................. تبي تثأر تقول أيه السبب من كثر عشاقي

غلبتني بالكلام وكنت اظن اني ابغلبها
........................ بعدها تبتسم وتقول تقدر عاد لفراقي

لا والله ما اطيقه لو دقايق كيف ابحسبها
...................... غيابك لو دقايق والله ان يوقف لدقاقي

حكاية حب هذا بس جانب من جوانبها
................... واظن اللي عرف هذا يبي يستنتج الباقي

واخيرا ما احب اطول ابياتي واعذربها
................... واذا اخفقت ارجوكم تناسوا حالة اخفاقي

...