فالمعركة والشعر ماينفع تكون انك جبان

من طرف **فهد بن محمد** السبت مارس 28, 2020 12:36 am

تسائلت وين القصيد اللي منوّل يافلان
...................... وحق ٍ لها تسأل وانا حق ٍ علي اجيبها
للشعر سجاته على كيفي اذا آن الاوان
.................... اجيب منه اللي عجز فالشعر عنها ذيبها
فالمعركه والشعر ما ينفع تكون انك جبان
...................... اما تكون الفارس المغوار والا سيبها
ياهيه ياللي تكتبون الشعر والدعوى عشان
........................ يقال صح لسانكم هذي انا مالي بها
انا اكتبه لامن شعرت اختل خط الاتزان
.................... وفي داخلي قام يتواجه شرها مع طيبها
اخذ مسار ٍ فيه لين اوصله حد الآمان
...................... ماهو مهم اخطيتها ماهو مهم اصيبها
يعني اجيب بضاعتي لكن ما معها ضمان
........................ ما كل عله ينفع التطبيب في تطبيبها
شفني وانا شايل حكايتها بقلبي من زمان
.................... اللي عليها الروح ذاك اليوم شقت جيبها
لا طبّ ينفعني ولا يوسع تباريحي مكان
.................. والمختبر وصفة علاجي ما عرف تركيبها
من شانها لاضاق صدري جاء الشعر ثم استدان
............. بعض المساحه من بعض ما ضايقه يحكي بها
لولاه بعد الواحد الفرد الرحيم المستعان
................. من حر فرقاها على صدري يبي يغلي بها
اكتب على الاوراق شي مالكم والله يبان
.................... قصـايد ٍ ماتنتهي يا شيب عيني شيبها
ماودي الحقها ملام ٍ من طويلين اللسان
.................... اللي على مفهومه الناقص يدور عيبها
ياكم سهرت بليلة اضفت علي بعض الحنان
.............. استشعرت مابي وطالت بي عشان اسري بها
لو بستمر اكتب كتبت ان كان طرق الشعر زان
................... لكنـّي اوقـّف هنا حتـى تقولوا جيبها