محاورة / البعير والموتر /

من طرف **فهد بن محمد** الجمعة مارس 27, 2020 9:02 pm

_ الموتر _
مرحبا بك يالبعير الي على الدرب يتمايل
وان قطعت الـدرب تاخذ فيه ايام وليالي

_ البعير _
ياهلا يالموتر اللي لانقـص زيته تهايل
يوم انا امشي في طريقي واتزود بالمفالي

_ الموتر _
انت تتعب راكبك وتعرّضه شمس القوايل
يوم انا اعطيه المكيف والمراتب والظلالي

_ البعير _
لا تميلح بالمكيف كم ذبحت من العوايل
هل سمعت بعير مره انقلب شي ٍ خيالي

ـ الموتر _
رغـم كل اللي تقوله مالقوا عني بدايل
وانت محد ٍ ملتفت لك لا تحاول هملالي

_ البعير _
احتفوا بي ما احتفوا بك لين خليت القبايل
مالها الا سيرة مزاين وتفرش لي زوالي

_ الموتر _
شوفني في كل عام ٍ اتجـدد بالشمايل
وانت نفسك يالبعير الاولي مازلت تالي

_ البعير _
يكفي اني في كتاب الله وخلقي لي مثايل
وانت تصميم البشر مافيك ذره من كمالي

_ الموتر _
بس تبقى يالبعير بعير مع بعض الفضايل
يوم انا اللي يزهموني للمشاوير الطوالي

_ البعير _
انت لازم يفرشون الدرب لك لا لا تحايل
يوم انا اقطع للدروب واخذ الدرب الموالي

_ الموتر _
انت لازم تستريح ان شلت نقلات الحمايل
يوم انا امشي في طريقي لا استريح ولا ابالي

_ البعير _
لو نقص ماء الرديتر كان يعمل بك عمايل
يوم انا اصبر للضماء صبر يفوق الاحتمالي

_ الموتر _
والله انك يالبعير افحمتني عنـد الفعايل
لك مجالك يوم انا لي في نهايتها مجالي

_ البعير _
انت فيك اشياء ولكني سبقتك بالطوايل
امسك الخط وتوكل قصرها يابن الحلالي