سجل لنا بيت احفظه في داخل المفكره

من طرف **فهد بن محمد** الجمعة مارس 27, 2020 8:42 pm

ان جيت اقاديها اقاديها بوزن المسطره
...............واتلها تلـّـة قوي العزم ايلا شق النفود
ابوي شاعر ما كتبت الشعر بسم الفشخره
...............يعني وراثه جاتني ورثتها من راس عود
انا وكيل معتمد مانيب اتاجر سمسره
.................متوارثين سوقها حتى قبل سبع الجدود
ما اشوف ابد فيها ولا ذرة سبب للمفخره
..............الشعر فن وموهبه ماهو على كثر الردود
خلك من اللي كل همّه يجمعه ثم نشره
..........شعر صمد عبر الزمن وآخر مفارقه الصمود
ماكل من يستخرج الالماس دقـّه وشطره
.............هذي تبي عين الخبير الي تسوي به عقود
كنت اتحاشى للكلام اللي ولا منه ثمره
............مثلي وانا ما احب اكسّر للحكي مثل الهنود
ان جبت لي بيت ٍ فخذ مني بدل بيت عشَره
..............اوخذ بدل عشرة بيوتك واحد ٍ بس معدود
احد اذا ورد لها جاء لك وهو معه شعره
.................واحد اذا ورد لها نوخ على بابك قعود
اسمج كلام ٍ فالكلام اللي يسمى ثرثره
............والصمت اجمل من كلام ٍ سامج مافيه فود
سجل لنا بيت احفظه في داخل المفكره
............وتذكره مرجع شعر لاطق عود ٍ راس عود
ان القصيده ماتجي من حالها مؤثِــّـره
..........والاّ سمعت اجمل شعر فالموز من فم القرود
لا نيب لا قاطع طريق ولا ارتكبت لمجزره
..........الشعر حكمْهْ مع هله والحكم حكم ال السعود
قرب لي اذنك واستمع باكر تقول المعذره
...........ما احد ذكر عنها خبر ترا البشر فيهم جحود
الله سبحانه شَرَع للذنب باب المغفره
............والا تصور كيف لو من دونها صار الوجود
عين ٍ ترا تمسي دلع وعين ٍ تبات مسهّره
.........وايلا صحت عين الدلع قالت ورى ماهم رقود
تصير قمة مهزله مع فبركه مع مسخره
...........من ورّد أبل ٍ ضاميه ولا عرف معنى الورود
كل شي ممكن ينفع الترقيع به والسمكره
...........الا الشعر طال الزمن والا قصر ركزة عمود
ياللوحه اللي بالإطار الخارجي بس منظـَره
............لولا اطارك ما لقت عين المشاهد فيك زود
توني عذرت لصاحب ٍ قبلي قطع له تذكره
..............خلى البلد قال البلد ماهوب عنوان الخلود
توني فهمت ان الحبر ماينقرا فالمحبره
............لولا القلم كان الحبر مازال في حالة جمود
الشعر يشبه ردة الفعل بتصرّف دكتـره
................النكته الي تضحـّكك والا تقابلها ببرود
الاولي تضحك معه والثاني ودك تصطره
...................لاقالها ثم ٍ ضحك وهي تلوّع للكبود
نعم نعم استعرض الابيات بعد العسكره
............اقود فوج ٍ فالشعر واعرض طوابير الجنود
ياعبقري الهندسه خل نتجادل عبقره
.............ارسم خطوط المنشأة واذكر تفاصيل البنود
والله ماتقدر اذا الارقام بس مقدّره
.................لما اقدّر حسبة ابياتي بدون أيـّة قيود
ان كانها يم الغزل استعرضي بالبختره
..............والا صحيح التسميه وريهم لمشي العنود
فيها معاني واضحه لكن مهيب (أ) مفسره
................فيها تراخي جالسه وتفز كالطير مهدود
فيها حلاوة مطلع الشمس وغيوم ٍ ممطره
..............فيها مزيج للبراءة والذكاء . صعبه ودود
ان حدثتك توشوش الدنيا حكايا مبهره
...........وان ميلت عنك النظر كنك فقدت اجمل وعود
كل ابتسامه ترسم احساس الليال المقمره
...............لحظة هدوء ٍ تاخذك معها ولا ودك تعود
حتى ترا ردّ النفس فيها شبيه الشوشره
..............الين توقيف النفس حتى على نفسك يرود
خطة هجوم عيونها ابدا ً مهيب مدبره
...............ترسل كذا نظراتها او قول تحشد للحشود
ان اقبلت تمشي ما كن ابد خـُلِق أيـّة مره
...........وان روحت تقلب صباحاتك مثل ماالليل سود
الكحل ماجاء عينها واللي يسمى مسكره
.........والطيب ما تستخدمه هل تشري الطيب الورود
ابث وجدي يمّـها بابيات شعر مكسره
...............محاولة اوصل احساسي لها بكل الجهود
بعد قطفت اجمل ثمر خليت من خلفي شجره
.............تنطر متى ارجع لها حتى بثمرها لي تجود
خليتها وانا ادري ان الوقت راهي بعثره
.................ياربما ارجع لها او ربما اني ما اعود