فيه فرق بين تحقيق الاماني والاماني

من طرف **فهد بن محمد** الجمعة مارس 27, 2020 8:31 pm

رغم جرحٍ صعب يبرا رغم ماجاني وصار

.................... جيت اقدم شكري لدرسك واقدم امتناني

لو سألني من سألني خذتها فالاعتبار

................... من هو الي علمك لاقول علمني زماني

الهزيمة اول الخطوات نحو الانتصار

..................... مثل تكوين الدقايق من معاناة الثواني

التجارب هي اساس الشي كله باختصار

................... اوعليها كيف ابعرف ياكثر شي ٍ خفاني

مثل طفل ٍ شاف طير ٍ رف بجناحه وطار

.................. حرك يدينه ويصرخ ليه ما اغادر مكاني

قلت ياحلم البراءه في خيالات الصغار

.................... فيه فرق ٍ بين تحقيق الاماني والاماني

من هنا كان الفراق احساس تغيير المسار

................. كنت اشوف ان المدينه مابقى فيها مباني

كنت مسجون الاماني خلف لحظة انتظار

................ صرت اقدّر ويش معنى دمعة انسان يعاني

أيه يا انتي يابعيده ياقريبه بالجوار

..................... لو تروحي آخر الدنيا تظلي في كياني

دام هذا حسب كل المعطيات افضل خيار

................ قلت يكفيني وجودك لو خذك انسان ثاني

يكفي اني كل يوم اشوفك اقبال النهار

................... ويكفي اني كل ليله اكتب لعينك اغاني

لو منيب استشعر لقربك يكون الانهيار

................ وما يجيبن النسايم منك من عطر ٍ كفاني

ريـّح يدينك حبيبي كان هذا اختبار

................... واتضح ان الاماني غير تحقيق الاماني