من سأل عنا سألنا عنه والله لا يهينه

من طرف **فهد بن محمد** الجمعة مارس 27, 2020 8:00 pm

دار سلمى لك سلام ٍ من رحلنا ذاخرينه

................ يا عسى تنقل سلامي لك هماليل السحابه

من وله طفل ٍ رحل مبطي واظنك تذكرينه

............. ما وضع يوم المفارق يوم في موضع حسابه

روّحت سلمى واهلها قالوا لابعد مدينه

..................... وابتدا تاريخ طفل ٍ يكتب لسيرة عذابه

صارت الدنيا بلاها رحلة ايام حزينه

.................... السفر ما له نهايه والمدى يكبر رحابه

آه ياليل الشعر يوم اتقلب في حنينه

....................... بين هم معتريني وبين شوق للكتابه

ان شكيت الليل همي جر في سمعي ونينه

............ وان رفعت الصوت اغني استلم قوس الربابه

وان سكت اطبق علي بصمته المظلم يدينه

................ ما تغنت به اماني ولا عوت وسطه ذيابه

من سأل عنا سألنا عنه والله لا يهينه

................. يوم يسأل عن خويه ويتنشد عن غيابه

الوفا طبع الوفي اللي تبارك به سنينه

................. ناس ما تحتاج منا لا كلام ولا خطابه

الوفا لو يكتب اسم ٍ كان يكتب في جبينه

.............. اربعة اسماء وبين الاربعه توجد مهابه

وكيف يا وجه السعد وانت الموالي والضمينه

................ ناوي ٍ تعمل علينا تالي الوقت انقلابه

وانت تدري لو بغوني ياخذونك كالرهينه

.......... وبالتفاوض لو بغوا راسي فدا لك لا غرابه

وكان به ميدان انا اول واحد ٍ تحمل يمينه

.................... لافته فيها عبارة كلن يفتش زهابه

كم نبي نلقى من اشياء في مخابيها دفينه

........... من حلال ايتام والا من شقى عيش الغلابه

ولافته اخرى تقول الموت ولا لا للغبينه

............ وتحتها اسماء كثيره من مطاليق الصحابه

البحر ماهوب يرحم كان ركاب السفينه

............ ما نهوا منهو خرقها حجة الماء واقترابه

سجة ٍ بين التغابي والتوسط والذهينه

............. تحتوي معنا التراخي والتمدد والصلابه

فيه جرح ٍ تربطه بالشاش وتعم السكينه

.......... وفيه جرح ما وجد له طب في علم الطبابه

الهزيله من يبيها كانها جنب السمينه

............. والهرم اصبح بعد آمون اطلال وخرابه

وشهو الانسان ببلا اولا تطبيق دينه

............ ثم وش يبقى اذا هو نوم واكل وانطرابه