عجل ٍ اكتبها وانا ما اداني اكتبها عجل

من طرف **فهد بن محمد** الخميس مارس 26, 2020 7:27 pm

جيت يمـّـك زابن ٍ قمـّـتك يا ارفع جبل
................... من صباح الله وانا ارقى جيتها عند الغروب

واستوت لي قمتك ياطويق اثر منتب سهل
...................... من تعالي قمتك كن الشمال اصبح جنوب

يستدير الراس في قمـّـتك ويضيع الخبل
.................... بس انا يا طويق جيتك باخص ٍ كل الدروب

ما معي الا القلم واوراق واشعار ٍ تهل
..................... وقمت اساجعها على نغمات هبات الهبوب

ماحلا نغمة شعر من دون مزمار وطبل
..................... وللشعر نغمه تخلي ضايق الخاطر طروب

عجل ٍ اكتبها وانا ما اداني اكتبها عجل
..................... ادري اني لو بها حتى اجتهد نلت الرسوب

ابتدي منين الحكايه مثل ما قال المثل
.................... كل ما عدلتها من صوب مال الحمل صوب

يا غدا كثر الشعر واهله غدوا كثر النمل
.................... واعتقد صار الشعر يوجد على هيئة حبوب

ليتها قشه ولكن ما قصم ظهر الجمل
.................... موجةٍ كلٍ ركبها وهي ماهي موجة ركوب

والله ان حتى جهازي لاسمع بعضه فصل
................... وخطر ٍ اسلاكه من اللي عبرها ياتي تذوب

ما ادافع عنه حتى ادعي اني بطل
...................... لكن اتحسر لأنـه صار كالشاة الحلوب

الشعر وانا طفل احبي حبا فيني طفل
................... واشهد انه فالغلا لاجيت ابحسبها محسوب

ما يفك العقدة الا من عقد راس الحبل
..................... لا مهوب اي واحد ٍ يقدر عليها لا مهوب

ما وجد قلب ٍ ابد يقبل بمن يهوى بدل
................. كل شي الا الهوى محد ٍ عن احد ٍ به ينوب

آه ليت الحب نزوه خامرتتني من جهل
..................... وآه ليت الحب ذنب ٍ لابغيت اتوب اتوب

الله اكبر كيف صار الحب اشعار ودجل
..................... الله اكبر كيف صار العوبة ٍ عند الكذوب

شوهوا كل الجمال اللي منول فالغزل
.................... وخربوا ذاك الجمال اللي بنبضات القلوب

يا بعدهم كل ما اكتب فيك ما اكتبه استقل
.................... ماكتبته لين اشوفه شي في مثلك يادوب

سايرك ركب المشاعر رغم احساس الخجل
...................... غازي ٍ روّح بثوب وما رجع الا بثوب

لك مدى ما له مدى ممكن يجيبه لي عقل
............... ولك مدى فوق الخيال اللي بدى فيه الشحوب

انتي فوق ان المشاعر ترسمك شعر وجمل
................ خطبها رسم الهوا يا كيف يا كبرى الخطوب

كيف اكوّن لك كلام ٍ وانتي من جابه اصل
............... وانتي من شكل حروفه في لغة كل الشعوب

اي لغة شعر ٍ تجيب إحساس ينقلها نقل
.................... لو اوردك الموارد كان اصيبت بالنضوب

لك سحابه فاللغه باقي مطرها ما هطل
...................... والمطر حزة هطوله عند علام الغيوب

وانتي اللي باقيه رجوى الشعر وانتي امل
...................... للقصايد ما تحقق ولا بعد حل الوجوب

و والله يا لك في فؤاد الشعر يا انتي محل
.................. مستعد يخوض دونه لاكبر انواع الحروب