الرجل يلبس لمشلح والمره تلبس عبايه

من طرف **فهد بن محمد** الخميس مارس 26, 2020 7:21 pm

ابتدي من وين قلي يارفيقي الليل قلي
دام انا وياك ياشعر انتلاوم فالحكايه

كل ما جيتك ادور عندك اشياء ٍ تسلي
جيتني تبحث عن السلوان ونرجع للبدايه

يا سرى ليل المعنى شاعر ٍ ليله يهلي
كنه الا حالف ٍ له بالسهر ببلا نهايه

ياشعر كيف الخروج ارجوك شف لحظة تجلي
خلنا معها نحلق يا سماك او ياسمايه

المهم ان الحصار اشتد وشايف وش حصلي
وانت اشوفك ما تحرك ساكن ولا انتب معايه

ازدواجية حضاره فرقت مجموع كلي
وانفرادية طغت حتى تحت اسم الهدايه

واحتضار للمبادي باسم تطوير ٍ محلي
واحتباس افكار ملزم لاحتمالات الدعايه

كيف تمشي فوق خيط ٍ كان عرض الخيط ملي
وكيف تبدع كان للابداع خطين وعصايه

وتستفز الهجس وين ان كانها خله على اللي
رتب اوضاعه مهندس ما معه أية درايه

وتستفز المفرده وشلون مع خله يولي
او اذا زادت على حرفين تصدمها كفايه

كانها بترديد ما اعتدنا تبيها مثل ذلي
الرجل يلبس لمشلح والمره تلبس عبايه

في شطر هالبيت قلي ويش تاخذ وش تخلي
صورة ما حققت حلم الكتابه والقرايه

ياتخليني اجيب المرزمات اللي تصلي
في محاريب الشعر تستسقي الغيث الهمايه

وان همت امطاره بروض ٍ يطيب لها تفلي
العقول اللي تدور فالورق حبك الروايه

مالنا نكتب حبيبي ليه بالله التغلي
مالنا مانكتب الا الهوى والله هوايه

قلتها للي على وزنة مساريها فطن لي
في امور ٍ كل ما حايلتها بذت خفايه