يشهد علي اللي خلقك انك على كل غير غير

من طرف **فهد بن محمد** الثلاثاء مارس 24, 2020 12:52 am

خضت الحروب وجيت لك اسير واقبلني اسير
........................ مستسلم لك والمحارب حط قوسه وسهمه

كم من جميل شافته عيني ولكنك مثير
..................... هذا الجمال ان دوروا انت هو بعينه وعلمه

يعني اروح لاول الدنيا او اخرها الاخير
......................... اني لعود مثل صاحب درة ٍ جاب فحمه

يشهد علي اللي خلقك انك على كل غير غير
........................... ولو الجمال ينافسك انكان تقطع لنسمه

فيك انت شي ٍ ما وجد قبلك ولا بعدك يصير
......................... شي ٍ يشوفونه ويدرونه ولا من ترجمه

ابسط من العذراء وهي ترقد على قطعة حصير
........................ واكبر من اللي تاجها عقد مزاج مصممه

والطف من النسمه وهي تسبح على وجه الغدير
.................. واكبر من البحر ان لوى وجه السفينه ولطمه

للطول فيها قـَسم ٍ لشي ٍ وفيها للقصير
....................... وللكبر فيها وللصغر مثال ردفه عن فمه

وفيها من الالوان الاسود لكن الملمس حرير
.................. واللون الاحمر ثم الابيض تمتزج في مبسمه

اطراقته ايلا غفل اطراقة الطفل الغرير
................. وايلا انتبه غصب عليك ايلا انتبه لك تحشمه

ايلا مشت كن المسافه تحتها هي من تسير
.......................... كني اقول انه يسير ولا يحرك لقدمه

باقبالها واقفايها يومك بلحظه يستدير
................ صبح ٍ عليك اقبالها ولااقفت ياليلك ما اظلمه

بابسط عباره لااقبلت في وجهها الصبح المنير
............. ولا اقفت وجا لك شعرها جب حلم ليلك واحلمه

ونعومة ٍ انعم من الناعم لذلك استخير
........................... اني اشبهها بشي غيرها لو ما انعمه

مدامنا ندري بان الخالق المبدع قدير
...................لازم تصدق معجزة هالحسن ولو ما تفهمه