الحياة اجمل صورها

منهو اللي جرد احساسك من آخر معطياته
لين صرت انسان لكن ينقصه شرط ٍ اساسي

من تجرد من احاسيسه فهو غير صفاته
ممكن التصنيف الاقرب صار من ضمن الكراسي

لو اعاتب من اعاتب دام وقتك في سباته
ما يغيرك الطموح ولا تغيرك المآسي

تدري الانسان وشهو كل همه في حياته
يوم نادوا والدينه قال سموا فوق راسي

وانطلاقه فالحياة اخلاقه اللي من صلاته
في مكان اللين لين بس فالصعبات قاسي

ما يهمه مدح غيره ولا تجيبه التفاته
ما تأثر من كلام المدح والشعر الحماسي

سلم عيونه طريق ٍ من بصرها كاشفاته
يعرف الدرب ان تلوى ويعرف الدرب متواسي

ان نوى يوم يتغنى بالشعر تلقى امسياته
في فياض ٍ زهرها يشهد على احلا الاماسي

وش هو الإنسان اذا ما كان يحصر امنياته
في مدى المعقول ويهلِك ما تبقى بالتناسي

الحياة اجمل صورها أب يلعب مع بناته
تسمع الضحكات من قلب ٍطبيعي لا سياسي

والحياة اجمل صورها أخ يتمنى خواته
يطلبونه شي ويقدر لو يقاسي ما يقاسي

والحياة اجمل صورها طفل يلعب وش حلاته
قمة الاشياء حلوى او على قوله بباسي

الصور هذي نموذج وكل شي ٍ له سماته
انت فرق والمعادن الذهب غير النحاسي

النهايه نفسها ما فيه فرق ولا شماته
تجمع اصحاب المعالي وتجمع اصحاب التكاسي